LAOAG CITY – Nagderetso iti pagbaludan ti agtawen ti 18 a baro kalpasan a natiliw gapu iti panagparti na ti aso iti Brgy. Pila ditoy siudad ti Laoag.
Segun ken ni PLt. Col. Joemar Labiano, ti hepe ti PNP ditoy siudad, adda ti naawat da a report mainaig iti panagparti ti aso ti maysa a residente iti nasao a barangay.
Inbatad na a dagus a nagresponde ti kapulisan ken dita a naaktuan nga agparparti ti aso ti suspek.
Kuna na a malaksid iti pannakatiliw ti suspek ket nakumpiskar ti nasurok 5.5 kilos a karne ti aso.
Inpakaammo ni Labiano a manamnama a sumango iti kaso a panaglabsing ti RA 8485 wenno Animal Welfare Act ti suspek.
Kabayatanna, inbatad ni Labiano a saan a masinunuo nu naggapoan ti naparti nga aso ken ti pakaipanan daytoy.
