LAOAG CITY – Nagsagaba ti sugat iti nagduduma a paset ti bagi ti maysa a babai kalpasan a nadesgrasya iti paset ti Brgy. Balacad ditoy siudad ti Laoag.
Segun ken ni Police Staff Sergeant Mark Briones, ti Duty Desk Officer iti PNP-Laoag Traffic Division, ti biktima a nangiturong ti Yamaha mio ket ni Joan Partible, agtawen ti 19 ken residente ti Brgy. Pila Laoag.
Inbatad na a basar iti naisayangkat nga imbestigasion, bayat nga agturong iti daya ti biktima ket dita a kellaat a napukawan ti kontrol iti manibela gapu iti kaadda na iti impluwensya ti nasanger.
Kuna na a basar iti panakisarsarita na kadagiti kakadua ti biktima ket napaspas ti panagmaneho daytoy idi napasamak ti desgrasya.
Immuna iti daytoy, inpakaammo ni Briones a ti biktima ket naggapo iti pagpiknikan iti Calayab Beach ken posible nga isu ti naginuman na ti nasanger.
Innayonna a naduktalan da bulod laeng ti biktima ti inusar na a motorsiklo.
