LAOAG CITY – Dead on Arrival ti maysa a barito iti napasamak a Self Vehicular Accident iti paset ti Brgy. 37, Calayab ditoy Siudad ti Laoag.
Nabigbig ti biktima a nangiturong ti motorsiklo a Yamaha Mio Soul I nga agmaris ti nangisit a ni Godfrey Antonio y Dela Cruz, agtawen ti 19, awanan asawa ken residente met laeng iti nasao a Barangay.
Segun ken ni PSSgt. Mark Briones, Duty Investigator ti Philippine National Police Laoag Traffic Division ken iti naiyuswat nga imbestigasyon, bayat a dumaldalyasat ti nakamotorsiklo nga agpadaya iti kurbaan ket dita a napukawan ti kontrol iti manibela a nangitunda ti pannakaidungpar daytoy ti poste ti Ilocos Norte Electric Cooperative (INEC).
Gapo iti daytoy ket nagsagaba ti nakana a sugat kangrunaan ti ulo na a dagus met a naitaray iti Governor Roque Ablan Sr Memorial Hospital ngem naideklara daytoy a dead on arrival babaen ken ni Dr. Ricarte Caday, Attending Physician ti nasao nga ospital.
Kunana a ti helmet ti biktima ket iggem na laeng, ken adda iti impluwensiya ti nasanger ti motorsiklo.
Mainaig iti daytoy, inpakaammo ni Briones a naggapu iti maysa a pagiinuman iti Brgy. Buttong ditoy Siudad ti Laoag ken kalpasan na ket napan pay daytoy iti Brgy. Calayab ket dita a nagiinumda manen kaduana dagiti kasinsin na.
Innayon na nga idi nakadanon da iti lugar ti nakapasamakan ti desgrasia ket manarimaan pay laeng a nakaandar ti motorsiklo ken nakapakleb ti biktima iti kalsada.
