LAOAG CITY – Boluntaryo a simmuko iti National Bureau of Investigation (NBI) ditoy ciudad ti Laoag ti maysa a wanted person a sumangsango ti kaso a panagrames.
Nabigbig daytoy a ni Alden Jenova, agtawen ti 28 taga Calayan, Island ngem agdama nga agtrab-trabaho iti ili ti San Nicolas.
Iti eksklusibo nga interview ti Bombo Radyo Laoag ken ni Atty. Diosdado Araos, mangidadaulo iti NBI, inbatad na nga adda ti inparuk-at ti korte a waarrant of arrest kontra ken ni Jenova.
Nupay kasta, timmawag kadakuada ti suspek ket inpakaammo na ti boluntaryo nga isusuko na isut gapu na a napan da sinukon iti mismo a pagnanaedan na ti nasao nga ili.
Innayon ni Araos a malaksid ti kaso ti suspek a panagrames ket awanen ti ammo da a sangsangwen na a sabali a krimen.
Kinumpirmaran ni Alden Jenova, agtawen ti 28 taga Calayan, Island ngem agdama nga agtrab-trabaho iti ili ti San Nicolas nga addan ti katulagan da ti pamilya ti maibagbaga a biktima na a menor de edad.
Iti interview kenkuana ti Bombo Radyo, inbatad na a nagbayad ti 15 a ribo a pisos ti pamilya ti agtawen ti 16 a menor de edad a taga Manila ngem agnanaed da iti Barangay 1 ditoy ciudad ti Laoag.
Daytoy ket tapno saan da nga ituloy ti mangipila ti kaso kontra kenkuana.
Inadmitir na a nobya na ti menor de edad ken adda ti napasamak kadakuada idi disyembre 24, 2016 ken pinilaan da ti kaso idi enero 7, 2017.
Innayon na a nagbayad ti 15 a ribo a pisos ti pamilya ti nobya na ngem saan da a kinayat a maamoan dagiti otoridad.
Inpasingked ni Jenova nga ilaban na ti kaso na.
Nairekomendar ti 200 a ribo a pisos a piyansa ni Jenova para ti temporaryo a pannakawaya-waya na.
