LAOAG CITY – Balligi ti pannakatiliw ti Top 6 Wanted Person iti Provincial Level ken Top 1 iti Municipal Level iti San Nicolas gapo iti kaso na a panagrames.
Segun kenni Police Captain Sygman Benigno, ti chief of police ti Philippine National Police iti ili ti San Nicolas, ti suspek ket agtawen ti 33, awanan ti asawa ken residente iti Barangay 23, Sta. Cecilia iti nasao nga ili.
Inbatad na a tiniliw da ti suspek babaen iti bileg ti warrant of arrest nga inparuk-at ni Hon. Bonhoffer Bernardez iti RTC Branch 4 ditoy ciudad ti Laoag gapo iti kaso a 2 counts of statutory rape, 1 count attempted rape, ken Acts of lasciviousness.
Inlawlawag na a basar iti imbestigasyon da, agtawen laeng idi ti innem ti biktima idi maipagarop a minolestya daytoy ti suspek ken ti naudi ket ita nga agtawenen ti 13.
Kunana a basar iti palawag dagiti nagannak ti biktima, no rumuar da nga agasawa ket ibati da ti anak da iti pataengan ti suspek ken kaay-ayam ti ubing ti mismo met nga anak ti akusado.
Naamoan a saan met a nagresistir ti suspek idi iserbi ti pulisya ti warrant of arrest gapo ta ammo na a nagpila ti reklamo ti partido ti biktima iti napalabas a bulan. Kabayatanna, narekomendaran met daytoy iti pyansa nga agarop 800 a ribo a pisos ti suspek ken kunana a sangwen na ti reklamo kontra kenkuana.
