LAOAG CITY – Natay ti maysa nga ubing a babai nga agtawen ti 6 iti Brgy. Sulquiano iti ili ti Dingras kalpasan a nalmes daytoy iti piskarya.
Segun ken ni Mrs. Luz Princess Alejo, ina ti biktima a kabayatan iti kaaddada iti uneg ti pagtaengan ket rimmuar ti inauna nga anakna tapno mapan umisbo ken sinarunona met daytoy ngem nagsubli dagus tapno mapan kitaen dagiti dua pay nga annakna a nabati iti kuartoda.
Inbatadna nga idi agsubli daytoy ket awan metten ti anakna nga agtawen ti innem iti ruar ti pagtaenganda isu a nagbirbirok daytoy kaduana dagiti dua nga annakna.
Nupay kasta, kunana a gapu ta saanda a makita ti anakna ket nagawid dagitoy ken riniingna ti inana tapno isu pay laeng ti agbantay kadagiti dua nga annakna.
Inlawlawagna a napan daytoy nagsubli kaduana ti maysa nga ubing iti karrubada tapno mapan agsursor ken agdamag kadagiti kabalbalayan amangan laeng ket ditoy a nagturong ti anakna.
Inpalgakna nga idi nakadanonda iti paset ti puon ti mangga nga asideg ti piskarya ket ditoyda a nakita ti maysa a bagi ti ubing nga agtatapaw a dagusna met daytoy a nalasin nga isu ti anakna.
Gapu iti daytoy, kunana a nagpaarayat daytoy ket dagusda a napan innala ken intaray iti Rural Health Unit babaen ti tricycle ti kaarrubada ngem pimmusay daytoy.
Innayonna a napaotda a sinapsapol ti anakna ken adayo iti pagtaenganda ti nakapasamakan ti lugar idinto a saanna met a masinunuo no apay nakadanon ti maseknan nga anakna iti piskarya.
