LAOAG CITY – Natukkol ti akin-kannawan a saka ti agtawen ti innem nga ubing kalpasan a nadungpar ti motorsiklo iti Barangay Parangupong iti ciudad ti Batac.
Basar iti imbestigasyon, kabayatan ti panagpad-padaya a direskyon ti motorsiklo nga inturong ti agtawen ti 43 a lalaki, laborer ken residente iti Barangay Sumader iti nasao a ciudad ket kellaat a bimmallasiw ti ubing rason a nadungpar na daytoy.
Naamoan nga adda ti kaay-ayam ti ubing iti kanal nga abay ti kalsada ken idi naglagto a bumallasiw ket pagisu met a dumalyasat ti motorsiklo.
Malaksid iti pannakatukkol ti akin-kannawan a saka ti ubing ket nagsagaba pay ti gasgas iti nagduduma a paset ti bagina ken naitaray iti Mariano Marcos Memorial Hospital and Medical Center iti ciudad para iti naan-anay a pannakataming na idinto a ti nangiturong ti motorsiklo ket saan a nadangran.
Segun ken ni Police Corporal Charlie Putulan, imbestigador iti PNP-Batac, nakapagsaritan ti nagannak ti ubing ken ti nangiturong ti motorsiklo no sadinno nga aggaammo dagitoy isut gapu na nga inurnus da lattan ti nasao a pasamak.
