LAOAG CITY – Pinaneknekan manen ti maysa a lola a saan a lapped ti kinataeng no adal ti pagsasaritaan.
Daytoy ket kalpasan a nagturpos iti sekondarya ni Mrs. Vicky Guillermo iti tawen na a 60, taga Tacloban ngem naikamang iti Barangay Boyboy, Piddig, Ilocos Norte.
Ni Lola Vicky ket maysa kadagiti ginasut nga estudyante ti Alternative Learning System (ALS).
Iti eksklusibo nga interview ti Bombo Radyo Laoag, inadmitir ni Guillermo a narigat ti eksaminasyon ngem inawat na a nalaing tapno makapasa ken makaturpos iti ALS.
Inyistorya pay ni Lola Vicky nga idi ubing ket inarapaap na ti agbalin a mangisursuro ngem gapu ti kinarigat ti panagbiagda ket saanna a naituloy ti nagadal, imbes ket napan simrek nga agtagibalay iti tawen na laeng a dose idiay Mindanao.
Kuna na nga idiay Metro Manila a nagam-ammo da ti naasawa na a taga Barangay Boyboy iti ili a Piddig ken naaddaan da ti uppat nga annak.
Inpakaammo ni Guillermo a kalpasan a nagturpos ti sekondarya ket plano na ti mangala ti vocational course.
Nagbalin a naisangsangayan a bisita iti panagturpos dagiti estudyante ti ALS iti Laoag Centennial Arena ni Governor Matthew Marcos-Manotoc.
