LAOAG CITY – Dinayaw dagiti naruay a tattao ti kandidata ti Miss Universe Argentina pageant gapu iti naubing a rupana iti baet nga agtawen daytoyen ti 60.
Ti retirement age kadagiti babbai idiay Argentina ket 60 ngem para ken ni Alejandra Marisa Rodriguez ti daytoy a tawenna ket rugi pay laeng ti beauty pageant journey.
Napagsasaritaan iti kallabes ti Latino netizens ni Rodriguez kalpasan a mangabak kas representative ti Buenos Aires para iti Miss Universe Argentina pageant. Adu ti saan a makapapati a ti tawenna nga 60 ket arig agtawen laeng daytoy ti 40 gapu iti langana.
Malaksid iti kinapintas ken kinaubing ti rupa ni Rodriguez, dinayawda pay ti background daytoy gapu ta maysa daytoy a lawyer ken journalist.
Iti agdama ket single ni Rodriguez ket kagapgapuna laeng iti panag-divorce.
Inbatad ni Rodriguez, napagtalinaedna ti kinalasbangna iti babaen ti panag-workout iti mamitlo a daras iti maysa a lawas kas panangsurot iti intermittent fasting ken panagusar ti facial cream.
Kuna ni Rodriguez, nangabak isuna kas representative ti Buenos Aires gapu ta nakita dagiti hurado a confident ken naimpapusoan nga inpakitana nga awan ti expiration date ti kinapitas ti maysa a babai.
Maiyuswat inton Mayo 25 ti Miss Universe Argentina pageant ken padpadaan ti kaadduan no ni Rodriguez ba ti mangabak iti daytoy tapno agbalin a representative ti Argentina iti 73rd Miss Universe pageant a maisayangkat idiay Mexico.
