LAOAG CITY – Kinagat ti maysa sunggo ti agtawen ti pito nga ubing bayat nga adda iti maysa a resort iti Brgy. Sales-Bulangon ditoy ciudad ti Laoag.
Basar ti pannakinnuman ni Dr. Renato Mateo, city health officer iti ina ti ubing, maipagarop nga inikkan ti anak na ti kanen ti sunggo ket ditoy a kinagat na.
Inbatad ni Dr. Mateo a kweskwestyunaran ti ina ti agtagikua ti resort mainaig ti safety dagiti agturong iti nasao a lugar nangruna ti kulungan ti nasao a taraken.
Gapo iti daytoy, manamnama ti panaginspek ti City Health Office (CHO) ti ciudad ti Laoag ti maysa a resort iti Brgy Sales Bulangon ti nasao a ciudad.
Mainaig iti daytoy, inrekomendar ni Mayor Chyvelle Fariñas nga agsursur dagiti kameng ti CHO kadagiti nagduduma a barangay gapo ta adda ti makitkita na nga agtartaraken ti sunggo a saan a nakakulong.
Inadmitir ti Mayor a kaadduan kadagiti naobserbaran na nga agtartaraken ti sunggo ket dagiti sumagmamano nga urban barangays.
Binagaan pay ti Mayor ti CHO a nasken ti panangimpormar da ti publiko a delikado ti panagtaraken ti sungggo.
