LAOAG CITY – Tiniliw dagiti kameng ti Philippine National Police (PNP) ti agtawen ti 51 a lalaki kalpasan ti maipagarop a panangmolestiya na iti karruba na nga agtawen ti pito nga ubing a babai iti ili ti Sarrat.
Daytoy ti kinumpirmaran ni Police Lt. Roy Manuel Ordonio, ti chief of police iti ili ti Sarrat.
Inbatad ni Ordonio a basar iti imbestigasyon da, kabayatan ti panagay-ayam ti biktima iti uneg ti paraangan da ket immasideg kenkuana ti suspek ken ditoyen nga inaramid na ti dakes a panggep na.
Kuna na nga apaman a nakapanaw ti suspek ket insigida a nagipulong ti biktima iti ina na isut gapuna a nagreport da met a dagus iti DSWD ken iti kwerpo ti pulisya.
Inpakaammo ni Ordonio nga iti inyuswat da nga hot pursuit operation ket nagballaigi da a nangtiliw ti suspek iti karayan nga asideg metlaeng iti pagtaengan na.
Innayon na nga iti pannakisarsarita da pay iti biktima ket inbutaktak na a daytoyen ti maikadwa a gundaway nga inaramid kenkuana daytoy ti suspek.
Mainaig iti daytoy, inpakaammo ni Ordonio a basar iti pannakaeksamen ti biktima ket positibo a nagaraw ti mabagbagina.
Inadamitir met ti suspek ti inaramid na iti biktima ken pagbabaywan na ti napasamak ngem inpetteng ni Ordonio nga ipursige da nga ipila ti reklamo kontra kenkuana.
Rumrumuar a nakainom ti arak ti suspek idi inaramid na ti nasao a krimen.
Iti agdama, temporary a nakabalud iti PNP-Dingras ti suspek gapu ta manarimaan ti pannakatarimaan ti PNP-Sarrat.
