LAOAG CITY – Iti tawen a 71, nangaramid ti pakasaritaan ni Jin Hui kas kaunaan a nakaleppas ti 100-meter sprint iti babaen ti 14 seconds.
Iti 2024 China Track and Field Masters, pinabilibna ti amin kalpasan a nalpasna ti lima nga event pakairamanan ti 100m, 200m, long jump ken relay races.
Iti oras a 13.97 seconds, saan laeng a nangaramid ti nailian a rekord no di ket nakagun-od pay ti lima a balitok a medalya.
Saan nga atleta ni Jin Hui idi agtutubo pay laeng isuna. Naduktalanna laeng ti track and field idi 2008 kalpasan a nagretiro ti maintenance worker iti maysa a planta ti landok.
Naammoan a kalpasan nga inallukoy ti anakna nga agay-ayam ti senior football, naduktalanna ti naidumduma a kinapaspasna a nangidanon kenkuana iti sprinting.
Iti agdama, planona a makibinnalubal iti world competition tapno ipaayanna ti naindaklan a pammadayaw iti pagilianda.
