LAOAG CITY – Pimmusay a dagus ti maysa a lakay kalpasan a napaltugan ti ulo na kabayatan ti panangiturong na ti motorsiklo, lubbon na ti live-in partner na iti paset ti Barangay Lubigan, Badoc, Ilocos Norte.
Nabigbig ti biktima a ni Rufo Polendey, agtawen ti 80 idinto a ti live-in partner na ket ni Amy Alcovendas, residente dagitoy iti Barangay Alay iti nasao nga ili.
Iti eksklusibo nga interview ti Bombo Radyo Laoag ken ni Police Major Artemio Clemente, ti chief of police iti ili ti Badoc, inbatad na a napan sinukon ti biktima ti live-in partner na nga agtrabtrabaho iti sentro iti nasao nga ili.
Nupay kasta, iti panagawid dagiti aglive-in partner ket adda ti nangsaruno kadakuada a dua a lallaki a nakalugan ti motorsiklo, ken apaman a nakadanun da iti paset ti Barangay Lubigan ket ditoyen a pinaltugan ti maysa kadagiti suspek ti ulo ti biktima.
Segun ken ni Clemente, maipagarop a 9mm a paltog ti nausar iti napasamak a pammaltog.
Innayon na a saan a naan-ano ti live-in partner ti biktima ngem gapu ti nakaro a buteng na amangan no isaruno da daytoy ket nagtartaray nga immadayo iti nakapasamakan ti krimen.
Agpapan maisursurat daytoy a damag ket saanna pay a kayat ti live-in partner ti biktima ti agsarita.
Inbatad ti opisyal nga itultuloy da ti agimbestigar a naimbag tapno maamoan no ti pannakapaltog ni Polende ket adda ti pannakainaig na iti pannakapaltog a poon ti nakatayan ti manugang na iti kallabes a napasamak iti Barangay Alay iti n nasao nga ili.
Kabayatanna, immapela ni Clemente kadagiti nakakita kadagiti suspek wenno adda ti ammo na iti napasamak a pammaltog a makikoordinar da laeng iti PNP tapno al-alisto a masolbar ti kaso.
