LAOAG CITY – Inbatad ni Mrs. Nenita Galapia, agtawen ti 60 iti Barangay Callaguip iti ili ti Paoay a nasakit ti nakem da kalpasan a naamoan da a ti asawa na a ni Lolo Patricio Galapia, agtawen ti 88 ket nairekord iti Department of Social Welfare and Development (DSWD) a pimmusayen.
Segun ken ni Mrs. Galapia, naamoan da daytoy a banag manipod iti maysa met laeng a barangay kagawad iti barangay da.
Kuna na a mabalin a daytoy ti makaigapu nga agpapan ita ket awan pay pulos ti naawat a pension ti asawa na.
Inpakaammo ni Mrs. Galapia nga adda ti kanagnagan ti lakay na ken isu ti pimmusay daytoy.
Kabayatanna, inpakaammo ni Mrs. Galapia nga uray ti programa ti DSWD a Social Amelioration Package (SAP) ket nagkedked ti maysa a kagawad a mairaman ti nagan ti asawa na gapu ta maipagarop nga awan ti ID na idinto nga adda met ti inpakita da.
Immun-una iti daytoy, kuna ni Lolo Patricio a masdaaw no apay awan pay pulos naawat na a rasyon iti baet a daytoy ti maibilang a kalakayan iti barangay da idinto a dagiti ub-ubing ngem isuna ket adda ti mait-ited a tulong kadakuada.
Agpapan ita ket saan pay a naala ti sungbat ti kapitan ti barangay ken iti biang ti Municipal Social Welfare and Development (MSWD) mainaig iti daytoy a pasamak.
