LAOAG CITY – Maysa nga agtawen ti 88 a video game vlogger idiay Sichuan Province, China ti napadayawan ti Guinness World Records gapu ta isuna ti kataengan a video game content creator iti intero a lubong.
Kinumpirmaran ti records keeping organization a Guinness World Records a ni Yang Binglin ti agdama a nakaiggem ti world record title nga “Oldest Video Game Content Creator.”
Ni Binglin wenno ad-adda nga am-ammo iti username a “Grandpa Yang” ket nagbalin a viral sensation idiay China kalpasan a nag-upload daytoy kadagiti videos-na nga agay-ayam ti video games.
Iti agdama, ni Binglin ket addaan ti 280,000 subscribers ken masansan daytoy nga agi-upload kadagiti videos a mabuya nga aga-ayam isuna kadagiti games kas ti Call of Duty ken Tomb Raider.
Segun ken ni Binglin a saan a dakes nga agay-ayam kadagiti video games ngem nagballaag daytoy kadagiti naub-ubing a subscribers a nasken nga aramidenda laeng daytoy kas pangliwliwa ken ad-adda latta nga ikkan ti oras ti panagbasa.
