LAOAG CITY – Maysa nga agtawen ti 95 a retired seamstress ti nabirukan manen ti sculpture-na kalpasan iti las-ud ti 40 a tawen a mapukpukaw.
Ni Maria Pulsone ti pinili ti employer-na a Kozinn & Sons Tailors nga agbalin a model ti ipaaramid nga estatwa nga agbalin a simbolo ti business-da.
Immannugot ni Maria iti baet a kumplikado ti proseso ti panangtulad iti itsurana gapu ta mabungon ti sibubukel a bagina ti plaster tapno makaaramid ti molde.
Iti kinarigat ti proseso, kinasapulan nga ikkan ti straw ti agsumbangir nga abut ti agongna tapno makaanges isuna. Nagbalin a sulit met ti amin idi malpas ti sculpture ken nai-display daytoy iti lobby ti tailor shop iti Manhattan, New York.
Sumagmamano a tawen met daytoy a naka-display ngem kellaat latta daytoyen a napukaw idi immakar iti lugar ti tailor shop.
Ti inpagarup ni Maria, nadadael ken inbellengda daytoyen ngem nakigtot idi mabirukanna daytoy iti online ti apokona ni Jennifer.
Nagbalin nga alisto ti panangbiruk ni Jennifer idi in-search-na iti Google dagiti keywords a “woman sewing statue.” Nakita ni Jennifer ti istatwa iti lolana a mailaklako iti maysa nga antique warehouse idiay Scranton, Pennsylvania. Mailaklako daytoy iti balor a $600 ken saan a nagdudua pay ti apokona ket ginatangna dagus daytoy.
Naragsak ni Maria idi makitana manen ti estatwana ngem gapu ta awan ti pangikabilanda iti pagtaenganda ket indunarda daytoy iti Italian American Museum tapno makita dagiti padada nga Italian-Americans.
