LAOAG CITY – Maysa nga agtawen ti 97 a lola idiay Utah, U.S. ti nakaawat ti high school diploma, walo a dekada kalpasan a nagsardeng a nagadal.
Idi 1940s, napilitan a nagsardeng iti panagadal ni Kathryn Cole tapno tulungan ti pamiliana. Adda iti Grade 12 idi ni Cole ken kasapulanna laengen a makumpleto ti maysa nga English subject tapno mailippas ti high school ngem natay ti lolona isu a kasapulannan ti agbirok iti pamastrekan para iti pamiliana.
Inbatad ni Cole, idi aldaw ti pannakaitabon ti lolona ket isu met ti aldaw a pannakaiyuswat ti eksaminasionda iti pagadalan.
Iti agdama, boluntario ni Cole iti Tabiona Public Schools tapno tulungan nga agbasa dagiti ubbing iti lugar. Gapu iti daytoy, napanunutan ti Tabiona High School a bigbigen ti volunteer work ken i-credit daytoy iti kurang nga English subject ni Cole idi adda pay laeng isuna iti high school. Ita a graduation season, naawaten ni Cole ti nabayagen nga arapaapna a magun-od ti high school diploma.
Kabayatanna, awan pay ti plano ni Cole ti panag-volunteer iti public school ken kalikagumna a tumulong iti panangisuro iti panagbasa kadagiti ubbing.
