LAOAG CITY – Immapela ni dati a Senate President ken agdama a Chief presidential legal counsel Juan Ponce Enrile iti Sandiganbayan a mangiparuk-at a dagus ti maysa a resolusyon iti mosyon na tapno maibasura ti plunder case kontra kenkuana.
Iti uppat a pinanid a motion for reconsideration, kiniddaw ni Enrile iti Sandiganbayan 3rd Division nga irekonsiderar ti resolusyun na idi Oktubre a mangkidkiddaw a masolbar ti demurrer to evidence gapu iti kinataeng nan.
Naipalaon pay iti mosyon ni Enrile nga imbes a solbaren ti demurrer to evidence kas naiyataday iti Rules of Court, inyaplikar ti anti-graft court ti Sandiganbayan Internal Rule nga awan ti kasiguradwan na no kaano a malpas ti pannakaipresentar dagiti depensa ti dadduma pay nga akusado, pakairamanan dagiti nakapenpen iti uneg ti siyam a tawen a kaso a narugyan paylaeng ti trial na idi pay Hunyo 2014 a saan a pulos a naikonsiderar ti tawen ken salun-at ti akusado.
Inpalagip ni Enrile a naipalaon iti Section 8, rule VIII ti Sangdiganbayan a ti demurrer wenno panagkedked iti ebidensiya nga inpresentar ti prosekusyon ket mabalin a masolbar wenno desisyunan a dagus.
Mainaig iti daytoy, inpetteng ni Enrile ti constitutional right na tapno maiyalisto ti pannakasolbar ti kaso na gapu ta iti agdama ket agtawenen ti 99, no sadinno a ti legal counsel na a ni Atty. Estelito Mendoza ket agtawen metten ti 93.
Maipalagip a namonganay iti plunder case kontra ken ni Enrile iti maipagarop a saan nga umiso a pannakausar ti P172 million a balor ti Priority Development Assistance Fund (PDAF), wenno pork barrel na idi agserserbi paylaeng kas maysa nga agpanpanday linteg.
