LAOAG CITY – Natay ti agtawen ti dua nga ubing a lalaki iti Barangay 50, Buttong ditoy ciudad ti Laoag gapu iti Pneumonia ken nakitaan pay dagiti sintomas ti sakit a dengue.
Nabigbig ti biktima a ni Jayrod Gregorio, agtawen ti dua ken residente iti nadakamat a barangay.
Inyistorya ni Mr. Rodverick Gregorio, ti ama ti biktima a tallo nga aldaw a nagtalinaed ti anak na iti Laoag City General Hospital (LCGH) sakbay a pimmusay.
Iti eksklusibo nga interview iti Bombo Radyo Laoag, inbatad ni Mr. Gregorio nga idi naamoan na a simmangpet ti dati nga asawa na kadwa na dagiti dua a baro da manipod idiay Metro Manila ket napan binisita a dagus dagitoy.
Kuna na a masdaaw gaputa pumurpuraw dagiti annak na ken naamoan na nga aggurgurigor dagitoy.
Gapu iti daytoy, inyawid na iti balay na ti inauna nga anak na nga agtawen ti uppat idinto a ti pimmusay nga agtawen ti dua a ni Jayrod Gregorio, agtawen ti 2 ket nagbati iti ina na.
Nupay kasta, gapu ta kimmaro ti gurigor ken uyek ti ubing a Gregorio ket inpan ti ina na iti LCGH.
Inbatad na nga idi napanna sinarungkaran ti anak na iti LCGH ket inar-arakop ti ubing ti nairot,ken saanna nga inpagarop nga isunti maudi a pannaka-arakop na a sibibiag.
Innayon ti ama a Gregorio a saan a nagbayag iti ospital gapu ta panpanunuten na met ti aggurgurigor nga inauna nga anak na nga adda iti balay na.
Inpakaammo ni Mr. Gregorio a kalpasan ti tallo nga aldaw a kaadda ti inaudi nga anak na iti LCGH ket nagkombulsyon isut gapuna a naipan iti Intensive Care Unit (ICU) idi malem ti huwebes, Oktubre 3, ngem iti oras ti alas-nuebe kinse ti rabii ket naideklara a pimmusayen ni Jayrod.
Immunan a kinumpirmaran ni Doctor Elizer Asuncion, ti mangidadaulo iti LCGH a natay ti ubing gapu iti sakit na a pneumonia, nakitaan dagiti sintomas ti sakit a dengue ken bimmaba pay ti platelet ti biktima.
