LAOAG CITY – Natay ti agtawen ti innem nga ubing a lalaki, residente iti Barangay 9 ditoy ciudad ti Laoag kalpasan a nalmes iti Padsan river.
Daytoy ti kinumpirmaran ni Dr. Melvin Manuel, ti mangidadaulo iti City Disaster Risk Reduction and Management Council ditoy ciudad ti Laoag.
Inlawlawag ni Manuel a basar iti impormasyon kadakuada, napan nagdidigus ti biktima ken tallo pay a pada na metlaeng a menor de edad iti karayan.
Nupay kasta, iti itatakdang dagiti ubbing manipod iti danom ket maipagarop nga adda ti nangiduron iti nasao a biktima iti danom no sadinno a saan dan a nakita pay.
Gapu iti daytoy, nagreport dagiti maseknan iti Bureau of Fire Protection nga isu met ti nangipakaammo ti napasamak iti City Disaster Risk Reduction and Management Council.
Insigida a nangiyuswat ti search ken rescue operation ti grupo ni Manuel kadwa da dagiti kameng ti Bureau of Fire Protection ken Philippine National Police no sadinno a kalpasan ti agarop 20 a minutos a panagsapsapol da ken nakita da ti bagi ti biktima.
Kuna ni Manuel nga apaman a naitakdang ti bagi ti biktima ket adda paylaeng ti pulso na isut gapuna a dagus ti Cardiopulmonary resuscitation sakbay nga intaray da iti Laoag City General Hospital.
Iti baet nga inpakat amin dagiti doktor iti nasao nga ospital ti kabaelan da tapno masalbar koma pay ti biag ti ubing, ngem kalpasan ti 30 a minutos ket pimmusayen.
Inbatad ni Manuel a possible a nagnerbyus ti biktima iti pannakaiduron na rason a saannan nga ammo ti inar-aramid na a nangitunda ti pannakalmes na.
