LAOAG CITY – Inbatad ni Barangay Chairman Elviro Agoo iti Brgy. Davila iti ili ti Pasuquin nga agtultuloy ti panangduktal na iti pudno a napasamak kalpasan a natamaan ti boga ti maysa nga ubing iti barangay da.
Kuna ni Agoo a basar iti immunan a report a naipadanon kenkuana, agtawen ti innem ti biktima, bakasyunista manipod iti Caloocan City ken adda ti nagpaayan da iti Sitio Diriqui iti nasao a barangay.
Inbatad na nga idi intulod dagiti kaay-ayam nga ubbing ti biktima iti nagtarusan da ket dita a nakita a dara-dara ti ngiwat daytoy gapu ta naputukan ti boga.
Ipakaammo ti kapitan a naiturong iti rural health unit ti ubing ngem naiyakaw iti Mariano Marcos Memorial Hospital and Medical Center iti siudad ti Batac gapu ta kasapulan a madait ti sugat na.
Gapu iti daytoy, nagpalagip ni Agoo kadagiti nagannak a masapa a bantayan dagiti annak ken saan nga ipalubos nga agusar dagitoy ti boga.
Innayun na nu pay naiget ti panagbantay ken panagpalagip da kadagiti residente nu saan a tumulong dagitoy ket saan a maliklikan nga adda ti mapasamak nga aksidente.
