LAOAG CITY – Pimmusay ti agtawen ti innem nga ubing a nadungpar ken naipasirok iti maysa a Toyota Fortuner nga agmaris ti gray iti sangwanan a mismo ti merkado publiko iti ciudad ti Batac.
Binigbig ni Police Lt. Col. Adrian Gayuchan, ti chief of police ti Philippine National Police iti ciudad ti Batac ti driver ti Fortuner a ni Mariano Francisco Nalupta idinto a ti biktima ket residente iti Barangay 21 iti ili ti San Nicolas.
Segun kenni Gayuchan, nagparking ti kurong-kurong iti igid ti kalsada nga asideg ti drive way ken nabati ditoy dagiti tallo a menor de edad nga agtawen ti walo, innem ken dua idinto a ti lola ken ina dagitoy ket napan da naki-tienda.
Inlawlawag na a basar iti imbestigasyon da ket nagay-ayam ti agtawen ti innem ken idi sumrek iti drive way ni Nalupta ket saan na a nakita ti ubing rason a nadungpar ken naipasirok daytoy ti nadakamat a behikulo.
Gapo iti daytoy ket nagsagaba ti sugat iti ulo ti biktima ken dagus met a naitaray iti ospital ngem naideklara a dead on arrival.
Agpapan maisursurat ti damag ket manarimaan met ti panagsarita ti pamilya ti biktima ken ni Nalupta.
Kabayatanna, immapela ni Gayuchan iti publiko nangruna kadagiti nagannak a saan a basta ibati dagiti ubbing nga awan ti mangkita a nataengan.
