LAOAG CITY – Nagtalinaed iti ospital ti agtawen ti lima nga ubing a lalaki kalpasan a nadungpar ti motorsiklo idiay Barangay Darasdas iti ili ti Solsona.
Ti nasao a biktima ket residente iti nasao a barangay ken ti driver ti motorsiklo ket nabigbig a ni Joel Bataan y Salbino, agtawen ti 42, awanan ti asawa, maysa a construction worker ken residente iti Barangay Manalpac iti nasao nga ili.
Basar iti imbestigasyon ti PNP, agpadaya a direksyon ni Bataan idi nadungpar na ti ubing a lumasat iti kalsada a naggapo iti abagatan.
Gapo iti daytoy, dagus a naitaray dagiti dua iti Rural Health Unit (RHU) iti nasao nga ili gapo kadagiti sinagaba da a sugat iti nagduduma a paset ti bagi da.
Naamoan a ti ubing ket naiyakar iti Gov. Roque Ablan Senior Memorial Hospital ditoy ciudad ti Laoag idinto a ti driver ti motorsiklo ket nakarwar met laeng iti ospital.
