LAOAG CITY – Saan pay a nabirukan ti agtawen ti 5 nga ubing a nalmes iti karayan iti paset ti Barangay Zamboanga ditoy ciudad ti Laoag.
Segun kenni Mr. Noriel Tejada, ti ama ti biktima ken operator ti backhoe, manarinaan ti panagtrabaho na ken inikkan na pay laeng dagiti dua nga annak na ti biscuit ken nagsubli dagitoy iti karayan a pagal-alaan ti asawa na ti tukmem.
Inlawlawag na a kalpasan ti trabaho na ken mapan na kuma alaenen dagiti aggi-ina na ket biruken met ti asawa na kenkuana ti biktima.
Gapo iti daytoy, dagus na a binatok ti karayan ngem gapo iti bannog na ket insardeng na ti nagbirok.
Inbatad na a basar kadagiti kakadwa ti biktima ket saan da a nadlaw a nagpukaw ti ubing ken awan ti nangeg da a nagriyaw nga agpatulong kuma.
Kunana a ti parte a naadalem ket ti nagkalyan na kabayatan ti trabaho na ken ditoy nga agturong ti ayos ti karayan.
Innayon na nga uppat wenno lima a metro laeng ti kaadayo ti nagkalyan na iti nagalaan ti tukmem ti asawa na.
Kabayatanna, inpasingked ni Dr. Melvin Manuel, mangidadaulo ti Serach and Rescue team ditoy ciudad ti Laoag nga aramiden da amin ti kabaelan da tapno mabirukan ti biktima.
Nupay kasta, ita a gundaway ket nagsardeng pay laeng ti retrieval operation ngem maituloy to met laeng intono alas-kwatro iti parbangon.
Naamoan nga adda ti agbati a residente iti nasao a barangay tapno agbantay ken no posible a makita da ti biktima.
