LAOAG CITY – Pimmusay ti maysa a menor de edad kalpasan a nalmes iti Pikkan Private Resort iti Barangay Capasan iti ili ti Dingras.
Ti biktima ket agtawen ti siyam, maysa nga estudyante ken residente iti Barangay Root iti nasao nga ili.
Basar iti impormasyon, naaddaan ti year-end get-together party ti Parents-Teachers Association (PTA) officers ken dagiti mangisursuro iti pagbasbasaan ti ubing iti nasao a pagdidigusan.
Naamoan a ti biktima ken ti dua pay nga ubbing ket napan naglangoy iti adalem a paset ti pool wenno aguneg ti 6 feet.
Nupay kasta, kalpasan laeng ti sumagmamano a minutos ket nagpukkaw ken nagpatulong ti kadua ti biktima gapo ta malmalmes daytoy.
Dagus a timmulong dagiti dadduma pay nga agdidigus tapno maalaw ti biktima ken naitaray iti Dingras District Hospital ngem naideklara a dead on arrival.
Kabayatanna, inbatad ni Police Captain Norman Pentang, ti chief of police ti ili ti Dingras nga awan ti foul play iti pannakatay ti biktima.
