LAOAG CITY – Natay ti agtawen ti uppat nga ubing a lalaki kalpasan a nalmes iti karayan iti Barangay Juan iti ili ti Solsona.
Inbatad ni Police Capt. Randy Damo, ti chief of police iti ili ti Solsona, a basar iti lolo ti biktima a ni Sherwin Bugiao, iti panagawid na iti balayda ket nagbalaw idi saan na a makita ti apoko na.
Gapu iti daytoy, nagsawar da a dagus iti aglawlaw agingga a nakadanun da iti karayan ket ditoyen a nakita da ti biktima.
Intaray da a dagus ti biktima iti Rural Health Unit iti ili ti Solsona ngem naiyakar iti Dingras District Hospital no sadinno a naideklarar a dead on arrival.
Segun ken ni Damo, ti biktima ket agsagsagaba ti autism spectrum disorder.
Innayon na nga adda ti 100 a metro ti kaadayo ti karayan manipod iti balay ti biktima.
Patien ti lolo ti biktima nga aksidente a natnag ti biktima iti karayan a nangitunda ti pannakalmes na.
