LAOAG CITY – Nalmes ti maysa nga ubing iti Bislak River iti Barangay 5 San Ramon iti ili ti Vintar.
Segun ken ni P/Capt. Jofel Pascual, Hepe ti Vintar Municipal Police Station, ti biktima ket agtawen ti uppat a babai.
Inbatadna a basar iti inwayatda nga imbestigasion, nagturong ti pamilia ti biktima iti nasao a karayan tapno mapan agdidigus gapu iti kinabara ti panawen.
Inlawlawagna nga agarup sangapulo a minuto pay laeng ti napalabas ket naripar dagiti nagannak a mapukpukaw ti buridek nga anakda.
Gapu iti daytoy, kunana nga insigida a nagkiddaw dagiti nagannak ti tulong kadagiti otoridad tapno biruken ti anakda a mapukpukaw.
Mainaig iti daytoy, inpakaammona a kalpasan ti sumagmamano a minuto a panagbirbirukda ket nakitada ti ubing nga insigida a naitaray iti Rural Health Unit iti ili ti Vintar ngem naideklarar a dead on arrival.
Innayonna a saan met nga adalem ti karayan gapu ta pagat-siket laeng daytoy ngem gapu ta bassit pay laeng ti ubing ket isu ti nangitunda ti pannakalmesna.
