LAOAG CITY – Inabswelto ti korte idiay Japan ti agtawen ti 88 a lalaki a maibilang kas kabayagan a balud nga adda iti death row
kalpasan a naduktalan a dagiti ebidensya ket naar-aramid wenno nabogus laeng kontra kenkuana.
Ni Iwao Hakamada ket adda iti death row iti agarop kagudua ti siglo ket naduktalan a guilty iti pammapatay iti boss na, karaman ti asawa ken dua nga annak da a menor de edad.
Naamoan nga iti laeng nabiit ket naipaayan iti pannakabista manen gapu ta adda ti atap da a nangimula dagiti imbestigador iti ebidensya para iti pannaka-kunviktar na gapu iti quadruple murder.
Ti 46 a tawen a panagtalinaed ni Hakamada iti death row ket nangitunda ti pannakaapektar ti mental health na isut gapuna a saanna a nakaatendar iti panagdengngeg ken saanna a naamoan a dagus ti pannaka-abswelto na.
Maibilang ti kaso ni Hakamada kas maysa kadagiti kaatiddogan ken “most famous legal case” a nakaawisan ti interest ti publiko no sadinno nga agarop 500 a tattao ti naggi-innuna para iti tugaw iti courtroom iti Shizuoka tapno maimatangan ti pannakadengngeg ti kaso.
