LAOAG CITY – Makalaarma ti agtultuloy a pannakaibyahe ti baboy iti ruar ti probinsya.
Daytoy ti ibatad ni Sangguniang Panlalawigan Member Domingo Ambrocio, ti chairman ti Committee on Agriculture.
Kuna ni Ambrocio a nu bilang agtultuloy ti pannakaibyahe ti baboy iti ruar ti probinsiya babaen kadagiti piggery farm nga aggatang kadagiti backyard hog raisers ket posible a maawanan ti suplay ti karne ti baboy ti probinsya.
Inbatad na a saan laeng nga agkurang ti suplay ti karne nu di ket maminpinsan a maibusan nu saan a malimitaran ti panagruar ti baboy.
Mainaig iti daytoy, kuna na nga addan ti pannakikoordenar na kenni iti provincial veterinary office babaen kenni Dr. Loida Valenzuala seknan iti daytoy a banag.
Inbunannag na a kiniddaw na manipod iti nasao nga opisina ti pannakamonitor a nalaing dagiti mairuar a baboy a dumalan iti border.
Kabayatanna, mangnamnama ni Ambrocio nga iti kabiitan a panawen ket addan ton ti iyetnag nga ordinansa ni Governor Matthew Marcos Manotoc seknan ti pannakakontrol ti pannagruar ti baboy.
Immapela pay ti opisyal iti publiko a masapol nga ikonsidera ti kasapulan ti umuli ken agtitinnulong a manglapped ti panagkurkurang ti suplay ti karne ti baboy ditoy probinsya.