LAOAG CITY – Agtultuloy ti panag-repack ti gobierno lokal ditoy ciudad ti Laoag kadagiti relief goods a maibunong kadagiti residente ditoy ciudad.
Daytoy ket kalpasan a nagsangpet dagiti ado a donasyon manipod iti nagduduma a personalidad ken organisasyon, pakairamanan ti nagatang a nayun dagiti bagas ti gobierno ditoy ciudad.
Inbatad ni Mayor Michael Marcos-Keon a kalpasan a mairepack dagiti relief goods ket dagus a maibunong ken isuna a mismo ti mapan agipan iti kada balay ditoy ciudad tapno makita na ti sitwasyon dagiti umili.
Immunan a naikkan ti 40 a relief goods iti kada barangay ditoy ciudad a naibunong kadagiti awan pulos ti pamastrekan na kabayatan ti Enhanced Community Quarantine (ECQ) gapu iti covid-19.
Maipalagip nga immabot laeng ti tallo ribo a relief goods ti naibunong iti kallabes gapu ta nalimitaran ti nagatang a suplay.
Nupay kasta, gapu ta ado dagiti nagdonar ti relief goods ket manamnama a mabunungan aminen dagiti residente ditoy ciudad ti Laoag ti relief goods.
