LAOAG CITY – Inbatad ni Barangay kagawad Jay-z Lagundino iti Barangay Pancian iti ili ti Pagudpud a naisardeng ti pannakawnit ti kalsada a nagaburan ti nagreggaay a daga manipod iti bantay iti Sitio Banquero iti nasao a barangay.
Kuna na a naibabawi ti plano a makissayan ti nabunton a daga iti kalsada ken maikkan ti dalan dagiti dumalyasat gapu ta delikado kabayatan nga agtultuloy ti panagreggaay ti daga.
Inbatad na nga apaman a mawakwaknitan ti lugar ket agregreg latta ti daga manipod iti bantay ken iti napalabas nga aldaw ket adda pay dagti back hoe a nagaburan.
Inpakaammo ni Lagundino nga iti agdama ket mapatta-patta nga addan 180 a metro ti kaatiddog ti kalsada ti nagaburan ti daga.
Mainaig iti daytoy, kuna ti kagawad nga addan ti inpatulod ti regional DWPH office nga equipment a mausar iti panagkutkot kadagiti nagreggaay a daga.
Mangnamnama ni Lagundino nga iti kabiitan a panawen ket mawaknitan ti lugar tapno makapagsubli ti pannakapalubos a dumalyasat dagiti behikulo.
