LAOAG CITY – Umad-adu ti inaldaw dagiti agad-adal nga agturturong iti Ilocos Norte Provincial Library.
Segun ken ni Mr. Eric Coloma, Provincial Librarian, daytoy ti kangrunaan a pakakumikumanda iti agdama.
Inbatadna nga ikarkarigatanda nga ipaay dagiti kasapulan dagiti amin nga agturturong iti Library kangrunaanna kadagiti agad-adal.
Kunana a nupay makumikumda ket maragragsakanda gapu ta ti kaadu dagiti mapmapan iti Library ti mangipamatmat nga adu pay laeng tyi agkasapulan ti serbisio ti Provincial Library.
Mainaig iti daytoy, inpanamnamana nga aramidenda ti amin a kabaelanda para iti ad-adda pay a pannakapasayaat ti serbisio ti Library.
Kunana nga agtultuloy ti panangpanunutda kadagiti wagas tapno matun-uyan dagiti pagkasapulan dagiti agturturong iti Library nangnangruna kadagiti agad-adal ken dagiti researchers.
Malaksid iti daytoy, innayonna nga ikarkarigatanda pay a mapagbalin ti aldaw ti Sabado iti Library a pagtitipunan dagiti agkakapamilia a mangmuli kadagiti ubbing a mangayat iti panagbasa ti libro.
