LAOAG CITY – Maysa nga agtutubo a fish vendor manipud Region 6 ti maibilang itan a kampeon iti Palarong Pambansa 2025, kalpasan a nangabak iti balitok a medalya iti 100-meter hurdles, elementary category.
Segun iti atleta a ni Eda Mae Arceo, Grade 6 pupil, daytoy ti kaunaan a gundaway a nakilaban iti Palarong Pambansa.
Inbatad na a narigat dagiti nagdalanan na a panagsanay ngem makunana a saan a nagkamali ken nasubadan amin dagitoy kalpasan a nagun-od na ti balitok a medalya para iti nakilabanan na a kategorya.
Inadmitir na a ninamnama nan a makagun-od ti medalya gapu iti naiget a panagsanay na isut gapuna a makunana a naan-anay a nakasagana iti isasabak na.
Nagyaman iti coach na ken kadagiti nagannak na gapu iti inpaay da a naan-anay a suporta.
Kuna ni Eda a ti laeng nagsanayan da iti coach na ket iti kadaratan iti lugar da gapu ta awan ti naurnus a pasilidad, ngem saan a nagbalin a lapped daytoy iti arapaap na a panagballigi.
Kabayatanna, inyistorya met ti coach na a ni Benedicto Prasas a nadiskubre da ni Eda idi Grade 5 no sadinno a sipud idin ket rinugyan dan nga insagana kadagiti kompetisyon iti athletics.
Inrakurak ti coach nga adda dagiti gundaway a masersermonan da ni Eda gapu ta iyun-una na ti panaglako na ti ikan ngem ti panagtraining na.
Nupay kasta, kuna ni Prasas a maawatan da ni Eda gapu ta isu ti pagbibiagan da isut gapuna a kasapulan da ti agtrabaho para iti pamilya da.
Innayon na a sipud idi 2018 ket aktibo dan kadagiti lokal a kumpetisyon, ngem ita da laeng a nakaabot iti national level, isut gapuna a ti balligi ni Eda ket maysa a dakkel nga inspirasyon para iti intero a Rehiyon 6.
Namnamaen ni Coach Prasas a makagun-od da pay ti ad-ado a balitok a medalya ita a tawen kas kadagiti nagun-od da iti municipal, regional, congressional, ken integrated meets.
Naamoan a saan pay a nalpas ti laban ni Eda gapu ta target na pay ti sumabak ken makaiyawid ti medalya para iti 400m hurdles, 800m hurdles, ken dua a relay events.
Manipod iti tiendaan agingga iti entablado ti palarong pambansa, ken manipod iti kadaratan agingga iti medalya ket pinaneknekan ni Eda a ti kinagaget ken kaadda ti determinasyon ken naan-anay a suporta ket makaanay tapno agballigi.
