LAOAG CITY – Natay ti maysa nga agtutubo a nangiturong ti motorsiklo kalpasan a nagsarili iti Brgy. 54-A Lagui-Sail ditoy siudad ti Laoag.
Ti biktima a nangiturong iti motorsiklo nga Honda Wave 125 ket agtawen ti 17, estudiante ken residente ti Brgy. 55-B Salet-Bulangon ditoy siudad.
Basar iti Laoag City Police Station, kabayatan a dumaldalyasat ti nakamotorsiklo nga agturong nga agpa-abagatan ket kellaat a napukawan ti kontrol ti manibela a nangitunda ti pannakaidungparna iti Gmelina tree.
Gapu iti daytoy, nagsagaba ti sugat iti nagduduma a paset ti bagi ti biktima a dagus a naitaray iti Governor Roque Ablan Sr. Memorial Hospital ngem naideklara a dead-on-arrival babaen ken ni attending physician Dr. Franky Albano.
