LAOAG CITY – Bimmaba ti bilang dagiti tattao nga agus-usar kadagiti produkto ti tabako a kangrunaan a pakaigapuan dagiti sakit ti bara pakairamanan dagiti sakit iti puso ken dagiti urat manipud 1.26 a bilyon idi 2020 agingga iti 1.24 a bilyon idi 2022 basar iti datos manipud iti World Health Organization (WHO).
Adda ti agarup 1.26 bilion a tattao iti sangalubongan ti nagusar kadagiti produkto ti tabako idi 2020, bimmaba daytoy a bilang idi 2022 agingga iti 1.24 a bilyon.
Basar iti report ti World Health Organization, dakdakkel ti panagbaba ti panagusar iti tabako gapu ta manamnama a bumassit ti bilang dagiti agus-usar kadagiti produkto ti tabako iti intero a lubong agingga iti 1.22 a bilyon ita a tawen 2025.
Naduktalan ti World Health Organization a ti Southeast Asia ti kaaduan a konsumo ti tabako idi 2022.
Agarup 411 a milyon a tattao ti agus-usar kadagiti produkto ti tabako iti abagatan a daya nga Asya, sarunuen ti makinlaud a Pacifico nga addaan ti 370 a milyon, Europa nga addaan ti 179 a milyon, Amerika nga addaan ti 133 a milyon, makindaya a Mediterranean nga addaan iti 92 a milyon ken Africa nga addaan ti 60 a milyon.
Naammoan nga agarup 224 a milyon kadagiti dandani 1.24 a bilyon a tattao iti intero a lubong nga agus-usar kadagiti produkto ti tabako idi 2022 ket babbai.
Segun iti World Health Organization, sumurok walo a milyon a tattao ti matmatay iti kada tawen gapu iti panagusarda iti tabako.
Apektaran met ti asuk ti sigarilio dagiti tattao a saan nga agus-usar kadagiti produkto ti tabako.
Maibasar iti World Health Organization, sumurok walo a milyon nga indibidual ti matmatay iti kada tawen gapu iti panagusarda iti tabako.
Nagballaag dagiti eksperto maikontra iti panagusar iti electronic cigarette a mabalin nga usaren a mangallukoy kadagiti ub-ubing a konsumidor ken mamagpeggad met iti salun-at ti tao.
Basar iti datos ti World Health Organization, ti 88 a pagilian awan ti kababaan a legal nga edad ti panaglako iti electronic cigarette.
Iti 74 a pagilian, awan ti legal a pagannurotan kadagitoy a produkto.
Napaspas nga umad-adu dagiti ubbing ken agtutubo ti panagusar iti nasao a banag a mangidiaya iti agarup 16,000 a flavor.
