LAOAG CITY – Inlawlawag ni P/Capt. Randy Damo, Hepe ti San Nicolas Municipal Police Station nga awan ti kinapudnona ti maipagarup nga adda ti agkumaw wenno agala kadagiti ubbing nga agwarwaras iti online.
Segun kenkuana, awan ti agkumaw wenno agal-ala ti ubing no di ket napanda laeng nagresponde idi kalman kadagiti nabartek a naiyaw-awan iti Barangay Barabar iti ili ti San Nicolas.
Inbatadna nga awan ti rumbeng a pagdanagan dagiti residente gapu ta saan nga agpaypayso nga adda dagiti agkumaw a nakadanon iti nasao a barangay.
Nupay kasta, inpasiguradona ti naiget a panagbantayda iti aglawlaw tapno masigurado nga awan ti makastrek nga agaramid ti dakes a panggep.
Kabayatanna, nagballaag ni Damo kadagiti agpo-post iti online a kumpirmaren nga umuna sakbay nga i-post tapno saan a maalarma dagiti makabasa iti daytoy.
