LAOAG CITY – Linawlawagan ni Police Maj. Joseph Tayaban, ti chief of police iti ili ti Badoc ti agwarwaras a video iti social media mainaig ti maipagarop a panagholdup ti maysa a lalaki iti maysa a pagtagilakoan iti Brgy. Garreta iti nasao nga ili.
Segun ken ni Tayaban, awan ti napasamak a panagholdup no di ket napan laeng nagkiddaw ti lalaki ti tulong gapu ta adda ti anak na iti ospital.
Mabuya iti CCTV footage nga immasideg ti maysa a lalaki iti kahera iti nasao a pasdek negosyo ken inruwar na ti nalabbaga a bassit a bag nga isumet ti kinargaan ti kahera iti kwarta.
Gapu iti daytoy, kalikagok ti chief of police a maikkat ti naipost iti social media gapo ta nagkamali laeng dagiti maseknan ti panagawat iti pasamak.
Innayon ni Tayaban a gapo ta awan iti panaghold-up a napasamak, ti koma mabalin a maipila a kaso iti saan pay a nabigbig a lalaki ket trespassing ngem awan ti plano ti biktima nga agreklamo.
