LAOAG CITY – Inlawlawag ni Mr. Jhey-ar Mangati ti Health Education ken Promotions Officer ti Mariano Marcos Memorial Hospital and Medical Center iti Siudad ti Batac a fake news ti agwarwaras nga impormasion iti social media a saan a mabalin nga agidunar ti dara dagiti nabakunaan kontra iti COVID-19.
Segun kenkuana, daytoy ket kalpasan a nangiparuk-at ti Public Advisory ti Department of Health wenno DOH pakaseknan iti daytoy a banag tapno saan a matikaw ken mabutent dagiti tattao nga agidunar ti dara.
Inbatadna nga amin a natudukan ti bakuna kontra iti makapatay a virus ket mabalinda nga agidunar ti dara aniaman nga oras basta laketdi asymptomatic dagitoy idinto a mabalin met agidunar dagiti addaan ti sintomas kalpasan a nakarekobre iti 14 nga aldaw.
Dinakamatna dagiti standard criteria mainaig iti panangidunar ti dara kas dagiti sumaganad a pagannurutan.
Kunana a nasken nga agtawen ti 16 agingga 65 dagiti maseknan nga agidunar ti dara ken saan a nababbaba ngem 50 kilograms ti kadagsen dagitoy.
Saan a dimmalan iti minor wenno major surgery, awan ti baro a tattoo dagitoy, body piercings, anti-rabies wenno anti-tetanus vaccine iti napalpalabas a tawen.
Saan nga involved iti high risk behaviors kas ti casual sex, male to male sex ken multiple sex.
Dagiti met addaan ti sakit a diabetes ken hypertension ket nasken a makontrol dagiti indibidual idinto a dagiti addaan pay ti dadduma pay a sakit ket masapol pay a dumalan nga umuna ti assessment.
Innayonna a dagiti maseknan a nakaptan ti COVID-19 nga adda iti critical ken severe cases a nasalinan ti plasma wenno dara ket mabalinda laeng ti makaidunar ti dara kalpasan iti maysa a tawen.
Kabayatanna, nagpalagip ti Health Education ken Promotions Officer ti nasao nga ospital nga iberipikar a naimbag dagiti impormasion sakbay nga i-share iti social media tapno maliklikan iti posible a pannakaiwaras ti palso a damag a mabalin a makaitunda ti pannakatikaw dagiti tattao.
