LAOAG CITY – Kinumpirmaran ni Police Senior Inspector Eddie Suyat, ti chief of police iti ili a Paoay ti panagballigi ti inyuswat da nga entrapment operation idiay Barangay Sangladan, Paoay Ilocos Norte.
Immuna ti daytoy, inbatad ni Suyat a napan nagreklamo iti opisina da ni Mrs. Florence Badjang, agtawen iti 43, naasawaan, negosyante ken residente met laeng ti nasao a barangay.
Daytoy ket gapu ti maipagarop a pananglukluko kenkuana ti checker na a ni Bob Albino Jr., residente met laeng ti nasao a barangay ken ni Jenil Lagmay, taga Barangay Acosta iti ciudad ti Batac, ahente ti pagor-orderan na iti ilako da nga arak.
Inbatad ni Suyat a basar iti palawag ti biktima, agbalaw gapu ta maluglugi ti negosyo na, ken adda ti nangidanun kenkuana mainaig ti pananglukluko kenkuana da Albino ken Lagmay.
Naduktalan a no agorder ni Badjang ti arak ket saan a kompleto ti ideliver ni Lagmay ngem kompleto latta ti bayad na nga alaen kenkuana ni Albino.
Inpakaammo ni Suyat a napilaan dan dagiti suspek ti kaso nga estafa ken qualified theft.
Naamoan a nabayagen ti kastoy nga ar-aramiden dagiti suspek.
