LAOAG CITY – Nagballaag dagiti Aid agencies iti nakaro a panagbisin a mapasaran iti Rakhine State idiay Myanmar.
Gapu iti daytoy, immapela ti World Food Programme (WFP) para iti ad-ado a donasyon tapno maliklikan ti nakarkaro a krisis iti nadakamat a lugar.
Maipalagip ti ahensya ket ikarkarigatan na nga ipaayan ti taraon dagiti naruay a tattao a naibakwit iti estado, pakairamanan ditoy dagiti 140,000 a Rohingya Muslim nga agdama nga agnanaed kadagiti kampo sipud nangrugi ti riribok idi 2012.
Naamoan a pinuted dagiti sumagmamano a pagilian ti panangipaay da ti tulong iti Rakhine gapu iti pananglaplapped dagiti tropa ti gobierno ti pannakaideliber dagitoy a nagresulta ti panagpaspasar ti nakaro a bisin dagiti rinibo a tattao.
