LAOAG CITY – Indanun ti Digital Pinoys ti pannakipagladingit da iti pamilya, papagayam ken dagiti ipatpatgeg iti biag ti motorcycle taxi rider a pimmusay kabayatan a nakapila tapno umawat ti financial assistance para kadagiti transport workers.
Inpetteng ti grupo, nga awan ti mangmangged a rumbeng a maikabil iti risgo wenno sugat ti salun-at ken biagna tapno laeng makaala ti tulong manipod iti gobierno.
Kuna da a dagiti assistance program ket masapol a mangipaay ti pigsa ken saan a mangitunda ti risgo ken makabannog a sitwasyon.
Dinakamat pay ti Digital Pinoys a ti insidente ket mangipakpakita ti dagus a panagkasapulan para iti naur-urnus a community facilities, organisado a distribution systems, ken naan-anay a panangusar ti digital technology iti aid disbursement.
Ti atiddog a pila, panagdudupudop ken manual processes ket aw-awagan da ti “outdated procedures” nga agtultuloy a mangparparigat kadagiti benepisyaryo.
Kangrunaan ti amin, inpetteng ti grupo a ti kumarkaro a problema ti overboarding iti motorcycle taxi sector, no sadinno a sobra ti kaado dagiti riders ti aggiinnagaw iti nakabasbassit nga oportunidad.
Nagpanawagan da iti Land Transportation Franchising and Regulatory Board (LTFRB) ken Department of Transportation (DOTr) a solusyunan a dagus ken pagsungbaten ti Transport Network Companies kadagiti pagannurutan a mangpakpakaro ti oversupply.
