LAOAG CITY – Nangrugi idi Abril 21, 2025, nangatngaton a terminal fee kadagiti eropuerto nga imatmatonan ti Civil Aviation Authority of the Philippines (CAAP).
Ti passenger service charge (PSC) para iti international flights ket ngimmato manipud iti ₱550 agingga iti ₱900 wenno sumurok-kumurang a $17 iti kada pasahero.
Para met kadagiti domestic flights, ti passenger service charge ket ₱350 kadagiti international airports, ₱300 iti principal class 1 airports, ₱200 iti class 2 ken ₱100 iti community airports.
Basar iti Civil Aviation Authority of the Philippines, ti panagngina ti panagsingir ket basar iti inflation ken gagem a mapasayaat ti pasilidad ken kapadasan dagiti pasahero.
Kabayatanna, dimmalan daytoy iti pampubliko a konsultasion ken kasapulan ti publikasion.
