LAOAG CITY – Naisina ti akinkannawan a tangan ti maysa a babai kalpasan a nagiling na idiay Barangay 26 iti ili a Bacarra.
Nabigbig daytoy a ni Ginalyn Vizcara, addaan iti umno a tawen, naasawaan, taga Isabela ngem agpapaay ken ni Jem Marahil, maysa a meat vendor iti Barangay 26 iti ili a Bacarra.
Segun ken ni Marahil, kalpasan a naggiling ti karne ni Vizcara ket napan na binugwan ti naggilingan na.
Nupay kasta, possible a saanna nga inikkat ti saksakan ti paggilingan a nangitunda ti pannakagiling ti akin-kannawan a tangan na.
Malaksid ti daytoy, naparpar pay ti akin-kannawan a tammudo ti biktima isut gapuna a naipan iti Rural Health Unit iti ili a Bacarra ngem naiyakar daytoy iti Bacarra Medical Center iti met laeng nasao nga ili.
Iti agdama, addan iti natalged a kasasaad ti biktima ngem nagtalinaed iti nasao nga ospital para iti agtultuloy a pannaka-obserbar ti sugat na.
Inpasingked ni Maranil nga ibaklay da amin a magastos ni Vizcara bayat ti panagpaagas na.
