LAOAG CITY – Natukkol ti akin-kannigid nga ima ti maysa a lakay kalpasan ti napasamak a desgrasya iti paset ti Bacarra Road ditoy ciudad ti Laoag.
Iti inisyal nga imbestigasyon dagiti otoridad, agpapaabagatan ti motorsiklo nga inturong ti agtawen ti 24 a babai a residente iti ili ti Vintar idinto a ti lakay ket adda iti igidi ti kalsada.
Nupay kasta, rumrumuar a bayat nga umas-asideg ti motorsiklo ket maipagarop a kellaat a nagpatingnga ti lakay.
Naamoan a kinabig ti babai ti motorsiklo na tapno liklikan ti lakay ngem timmama latta ti tambutso iti lakay.
Dagus met a naitaray ti lakay iti Gov. Roque Ablan Senior Memorial Hospital ditoy ciudad ti Laoag para iti naan-anay a pannakataming ti biktima.
