LAOAG CITY – Inpakaammo ni Police Staff Sergeant Bezaleel Baengan, ti imbestigador iti PNP ditoy ciudad ti Laoag a desidido a mangipila ti reklamo ti akinkua ti bisikleta a maipagarop nga intaray ti maysa a menor de edad a naglibas manipod iti Bahay-Pagasa ditoy ciudad.
Nabigbig ti agtagikua iti bisikleta a ni Mark Christian Pascual Lorenzo, agtawen ti 18, baro ken residente ti Brgy. 47, Bengcag ditoy ciudad.
Maipalagip a ti mountain bike a mountain peak everest nga agmaris ti glossy dark blue nga agbalor ti 60 ribu a pisos ket nabirukan iti Brgy. 1 iti ili ti Sarrat.
Segun ken ni Baengan, agarup 1:30 ti malem idi Marso 7 a nagkammang iti kuerpo ti pulisia ditoy Siudad ti biktima tapno ipakaammo a mapukpukaw ti bisikletana.
Inbatadna nga iti panangiyuswat da ti naun-uneg nga imbestigasion, agarup alas 11 ti rabii idi Marso 2 ket napan ti biktima iti pagtaengan ti kasinsinna ken kalpasan laeng ti sumagmamano a minuto ket nagsubli daytoy iti pagtaenganda no sadinno a ditoy a nariparna nga awanen ti bisikletana a naka-parking laeng iti sango ti balayda.
Inlawlawagna nga iti panagimbestigar da ket nadiskubre da ti maysa a pares ti tsinelas a Nike nga agmaris ti nangisit ken gray.
Mainaig iti daytoy, kunana a kinumpirmaran ni Ms. Catherine Calaustro, ti naka-duty a kameng ti Civil Security Unit (CSU) iti Bahay Pag-asa nga agpada ti tsinelas ti ubing a nakalibas iti nakita a tsinelas a nabati iti maysa a pagtaengan.
Innayonna a masansan nga ar-aramiden ti biktima ti mangi-parking iti bisikletana iti sango ti pagtaenganda iti laksid nga awan ti gate da isut gapuna nga alisto laeng a nakastrek ti suspek ken ditoyen nga innala na ti bisikletana.
Iti agdama ket adda pay laeng iti kustodyar ti PNP-Laoag ti bisikleta kabayatan ti pannakaiproseso ti maipila a kaso a Theft kontra iti nasao a suspek.
Ti suspek ket sumango iti panaglabsing ti Republic Act (RA) 6539 wenno ti The New Anti-Carnapping Law.
