LAOAG CITY – Kinondenar ti Palalay Hotel iti alegasyon a dagiti staff iti nagtakaw dagiti sanikua dagiti turista iti nagiyanan da nga hotel iti nasao ili a Burgos itay kallabes.
Segun kenni Milagros Ocampo Palalay, agtagikua ti nadakamat nga hotel, patien na a modus operandi iti pasamak ken saan da nga admitiren agingga a saan a malpas iti imbestigasyon.
Inpasingked na nga awan iti nakita dagiti otoridad a natakaw a sanikua dagiti biktima kalpasan iti panagbirok da kadagiti kwarto ti hotel karaman dagiti guests.
Naitaray dagiti mannakaw ti bag a naglaon ti alahas, 20 a ribo a pisos a kuarta, dua a cellphone, singsing, ATM ken dadduma pay.
Kunana a nabayagen nga agopoperar ti hotel ngem ita pay laeng a gundaway a napasamak kadakuada daytoy.
Inpalgak na nga adda pay gwardya a nakabantay iti 24 nga oras ngem awan pulos iti napuotan na a napasamak a panagtakaw iti dayta a gundaway.
Inbunannag na nga agdemdemanda dagiti natakawan iti 50 ribo a pisos kas konsiderasyon kadagiti natakaw a sanikua da.
Itudtudo dagiti biktima a dua kadagiti empleyado ti nasao nga hotel iti nagtakaw.
Inpasingked ni Palalay a nakita na iti kalidad dagiti empleyado na gapu ta ket nagaget ken intrain na a nasayaat dagitoy ken nabayag dagitoyen nga agpapaay iti hotel na.
Nupay kasta, inpetteng na nga awan iti bayadan da gapu ta awan pulos iti tinakaw da kadakuada.
Kunana nga ipilpilit dagiti biktima a basol ti hotel iti pannakatakaw dagiti sanikua da.
Innayon na a nakasagana da a sungbatan iti aniaman a kaso a maipila kontra iti hotel.
Kabayatanna, inpetteng ni Allaine Cabili, maysa kadagiti housekeeping staff ti Palalay Hotel ken maysa kadagiti timmulong a nangiyuli kadagiti gamit dagiti turista a natakawan itay kallabes nga inlapag da laeng iti ruar ti guest room dagiti gamit dagiti maseknan ken saan daytoy a simsimrek.
Inlawlawag na a bayat iti panangimbestigar dagiti otoridad kadakuada ket pinilit da ida nga admitiren iti napasamak a panagtakaw ken ipairwar da dagiti ATM ken ID dagiti biktima.
Kunana nga awan iti maited da gapu ta awan met iti tinak-takaw da.
Inbatad na a saan a patas iti panagimbestigar dagiti pulis gapu iti ipilpilit da nga isuda iti akin-basol a nagtakaw.
Malaksid iti dayta, saan laeng daytoy iti umuna a daras a napasamak iti insidente no sadinno a pinilit idi dagiti otoridad isuna nga admitiren iti pasamak.
Inbutaktak na a kuna dagiti pulis a mapan da latta idisso dagiti gamit a tinakaw da iti sabsabali a lugar tapno dagiti pulis nukwa iti makakitan.
