LAOAG CITY – Nakaruaren ti aktor a ni Ricardo Cepeda kalpasan a naibalod ti agarup maysa a tawen gapu iti reklamo nga estafa.
Iti online post ti asawana a ni Marina Benipayo, makita ti panagsalada ti aktor iti kanta a “Don’t Be Cruel” ni Elvis Presley.
Napalaos ti ragsakna gapu ta nakadennana manen ti asawana kalpasan ti 11 a bulan ken nagyaman isuna kadagiti nangipadanon ti panagkararag para kenkuana.
Maipalagip nga idi Oktubre 2023 idi naarestar ti aktor idiay Caloocan City gapu iti reklamo nga estafa.
Naibalod ti aktor iti Cagayan Provincial Jail iti siudad ti Tuguegarao City idiay Cagayan.
Inlawlawag ti aktor nga endorser laeng isuna ti produkto ken saan a direkta a konektado isu a masdaaw daytoy no apay a nairaman isuna.
Kinablaawan met dagiti showbiz personalities ti online post ni Marina Benipayo kalpasan a nakaruaren ti aktor.
