LAOAG CITY – Nangipilan ti Certificate of Candidacy ti aktor a ni Arjo Atayde para iti maminsan manen a panagpaidasigna kas Quezon City 1st District Representative.
Kadua ni Arjo ti inana a ni Sylvia Sanchez-Atayde ken dagiti mangsupsuporta iti panangipilana ti Certificate of Candidacy iti Comelec National Capital Region Office.
Naammoan a karaman kadagiti nangipakita ti suporta ken ni Atayde ket ni Quezon City Mayor Joy Belmonte.
Inbatad ni Atayde a kalikagumna nga itultuloy dagiti narugianna a programa ken proyekto a nakabenepisiaran ti distrito uno idiay Quezon City.
Iti umuna a terminona, nailungalong ni Atayde dagiti napapateg a gakat kas ti Eddie Garcia Law, ti Internet Transactions Act, ti Anti-Agricultural Economic Sabotage Act ken ti Magna Carta of Filipino Seafarers Act.
Maipalagip a namin-adu a daras a nagpanawagan ni Atayde para iti flood control projects idiay Quezon City a masansan a malaylayos no makapasar ti dakes a paniempo.
