LAOAG CITY – Agtitipon dagiti cardinal ti Simbaan Katolika iti maysa a sikreto a conclave mangrugi intono Mayo 7 tapno agpili ti sumaruno a Santo Papa.
Daytoy ket basar iti maysa a nangato nga opisyal ti Vatican.
Napagtutulagan ti petsa iti maysa a closed-door meeting dagiti cardinal iti Vatican, a kaunaan a taripnong dagiti cardinal sipud naitabon ni Pope Francis idi sabado, Abrl 26.
Namnamaen ti opisyal a pannakaiwaragawag daytoy kadagiti sumarsaruno nga aldaw.
Adda ti pakabuklan a 135 a cardinal manipod iti nagduduma a paset ti lubong ti mabalin nga agbotos iti conclave para iti baro a mangidaulo ti Simbaan Katolika nga addaan ti 1.4 bilyon a miembro iti intero a lubong.
Ti naudi a dua a conclave idi 2005 ken 2013 ket nagpaot laeng iti dua nga aldaw.
