LAOAG CITY – Inpetteng ti legal counsel ni suspended Bamban Mayor Alice Guo a saan pay a napaneknekan dagiti alegasion kontra iti nasuspinde a Mayor.
Inbatad ni Atty. Stephen David, dagiti alegasion a nagulbod ni Alice Guo maipanggep iti nasionalidad ken kinataona ket nagtalinaed nga alegasion.
Inlawlawagna a saanda pay a nakita dagiti dokumento manipud iti National Bureau of Investigation (NBI) maipapan kadagiti saludsod iti pudno a kinatao ti nasuspinde nga opisial.
Kunana nga iti agdama, kasapulan a dumalan amin dagitoy iti naiget a pannakatingitingna.
Inpalgakna a no mamati ti National Bureau of Investigation wenno dagiti complainants dagiti nasao a dokumento ket ti maidasar nga ebidensia, masapol nga ipresentar daytoy iti Korte.
Kunana a mabalin laeng nga agkomento iti kampoda no nakitadan dagiti nadakamat a dokumento, natakuatan, naarisit ken sigurado iti pammaneknek dagiti nasao a dokumento.
Maipalagip nga immunan nga inrakurak ti National Bureau of Investigation a maymaysa dagiti fingerprints da suspended Mayor Alice Guo ken maysa nga agnagan ti Chinese passport holder a nabigbig a ni Guo Hua Ping.
Kabayatanna, malaksid kadagiti dua a kontrobersial a nagan, adda pay ti maysa a dukduktalenda nga Alice Guo a basar iti National Bureau of Investigation ket nangala ti clearance idi 2005.
